राजविराज । सप्तरीको खडक नगरपालिका वडा –५ स्थित पूर्व पश्चिम राजमार्ग अन्तर्गत रन्जितपुरमा शुक्रबार ट्रकको ठक्करबाट एक साइकल यात्रीको घटना स्थलमै मृत्यु भएको छ ।
पुर्वबाट पश्चिमतर्फ जाँदै गरेको ना.८ ख २८१६ नम्वरको ट्रकले बिपरित दिशाबाट साईकलमा आउदै गरेका स्थानीय ६० बर्षिय माखन साहलाई ठक्कर दिंदा घटना स्थलमै मृत्युु भएको प्रहरीले जनाएको छ ।
मृतक साहको शव राजविराज स्थित गजेन्द्रनारायण सिंह अस्पतालमा रहेको तथा ठक्कर दिने ट्र्क र ट्रक चालक प्युठान छिन्ताङ्गका बम बहादुर पुनलाई नियन्त्रणमा लिई आवश्यक कारबाही अगाडि बढाइएको जिल्ला प्रहरी कार्यालय सप्तरीले जनाएको छ ।
ट्रकको ठक्करबाट साहको मृत्यु भएपछि आक्रोशित स्थानीयबासी तथा आफन्तहरुले सडकमा टायर बालेर प्रदर्शन गरेका थिए । स्थानीयले सडक अवरुद्ध गर्दा पुर्वपश्चिम राजमार्ग भई चल्ने सयौं सवारी साधन सडकमै थन्किएको थियो । प्रचण्ड गर्मीमा चक्काजाम हुँदा हजारौं यात्रीले सास्ती खेप्न बाध्य भएका थिए ।
