कञ्चनरूप । पाथीभरामा केबलकार निर्माणको विरोधको क्रममा नराख्ने पक्षधर र प्रहरीबीच झापाको दमकमा झडप भएको छ । अरुण पूर्वका नौ जिल्ला बन्दको घोषणा गरी सडकमा ओर्लिएका बन्दकर्ता र प्रहरी बीच झडप भएको हो । झडपका क्रममा दोहोरो ढुंगा हानाहान भएको छ ।
प्रहरीले बन्दकर्तालाई लछारपछार गरी नियन्त्रणमा लिएको छ । केहीलाई कुटपिट समेत गरेको छ । स्थिति नियन्त्रणमा लिन तीन सेल अश्रुग्यास प्रहार गरेको प्रहरीले दमकबाट सातजना बन्दकर्तालाई पक्राउ गरेको छ ।
प्रहरीले पदम बेघा, धनकुमार योङहाङ, शुक्रवीर लिम्बु , आदित्य फियाक , प्रकाश लावुङ, सन्देश लिम्बु र नाम्साङ लिम्बुलाई पक्राउ गरेको छ । उनीहरू संघीय लोकतान्त्रिक राष्ट्रिय मञ्चका कार्यकर्ता भएको जनाइएको छ ।
दिउँसो दमक नगरपालिका ६ को गणतन्त्रचोकमा संलोरा मञ्चका अध्यक्ष कुमार लिङ्देनको नेतृत्वमा बन्दकर्ता सडकमा ओर्लिएका थिए । सडक बसेर बन्दकर्ताले टायर बालेपछि प्रहरीले बल प्रयोग गरेको हो । बन्दकर्ताले प्रहरीमाथि ढुंगा बर्साएपछि प्रहरीले पनि बन्दकर्तामाथि धरपकड सुरू गरेको थियो ।
ढुंगा प्रहारबाट मे १ च ५१६१ नम्बरको स्कोरपियोसहित केही सवारी साधनमा क्षति पुगेको छ । यातायात अवरुद्ध पारेपछि अश्रुग्यास प्रहार गर्नु परेको जिल्ला प्रहरी कार्यालय झापाले जनाएको छ ।
दमकको आकाशे पुलमा भेला भएर बन्दकर्ताले यातायात अबरुद्ध गरेपछि बैकल्पिक मार्गबाट मात्रै सवारी साधन सञ्चालन भइरहेको जनाइएको छ ।अहिले पनि पूर्वपश्चिम राजमार्गमा भयको अवस्था छ ।
