जनकपुरधाम । मधेश प्रदेशको राजधानी जनकपुरधाममा साउन २६ गते नेपाल पत्रकार महासंघ मधेश प्रदेशका पदाधिकारी, सदस्य तथा अन्य सञ्चारकर्मीमाथि भएको आक्रमणप्रति समाजवादी प्रेस संगठन मधेश प्रदेश समितिले गम्भीर ध्यानाकर्षण जनाएको छ।
महासंघका अध्यक्ष श्याम बन्जारा, उपाध्यक्ष ज्योति झा, महासचिव शैलेन्द्र सहनी ‘क्रान्ति’, पत्रकार दिवाकर राय, अनिलकुमार गिरी लगायतका सहकर्मी पत्रकारहरू आक्रमणमा परी घाइते भएका छन्। घाइतेमध्ये महासचिव ‘क्रान्ति’को खुट्टा मोडिएको छ भने अन्य पत्रकारलाई टाउकोमा समेत चोट लागेको छ।
समाजवादी प्रेस संगठनले पत्रकारमाथि हुने यस्ता हिंसात्मक आक्रमण प्रेस स्वतन्त्रता, लोकतान्त्रिक मूल्य र मान्यतामाथि खुला चुनौती भएको भन्दै कडा निन्दा गरेको छ। संगठनले पत्रकारलाई तर्साउने, डर फैलाउने वा शारीरिक आक्रमण गर्ने प्रयास सह्य नहुने चेतावनी दिएको छ।
संगठनले घटनाको निष्पक्ष र छिटो छानबिन गर्न,दोषीलाई कानुनी दायरामा ल्याउन,पत्रकारको सुरक्षा सुनिश्चित गर्न ठोस योजना र कार्यान्वयन गर्न माग गरेको छ संगठनका सचिव प्रमोद चालिसेले विज्ञप्तिमार्फत भनेका छन्, “पत्रकारमाथिको आक्रमण लोकतन्त्रमाथिको आक्रमण हो, यसका विरुद्ध आवश्यकता परे सामूहिक आन्दोलन गर्न हामी पछि पर्दैनौं।”
