विराटनगर । नेकपा एमालेका नेता तथा कोशी प्रदेश अध्यक्षका प्रत्यासी विनोद ढकालले आफूलाई हराउन प्रदेशको सत्ता प्रयोग गरिएको दाबी गर्नु भएको छ । ढकालले बिहीबार विराटनगरमा पत्रकार सम्मेलन गर्दै प्रदेश सरकार विस्तारसमेत आफूलाई हराउनका लागि गरिएको जिकिर गर्नुभयो ।
उहाँले आफूलाई सहयोग गरेकै कारण कुनै नेता कार्यकर्तामाथि विभेद भए त्यसको संरक्षणका लागि आफु उभिने पनि बताउनभुयो । आफू पञ्चायत कालदेखि नै पार्टी राजनीतिमा सक्रिय भएको र पार्टीमा कुनैपनि अवस्थामा विचलित नभईकन लागेकाले अब पनि थप सक्रियताका साथ लाग्ने ढकालको भनाइ छ ।
आफूले निर्वाचनको नतिजालाई स्वीकार गरेको बताउँदै उहाँले आफू पार्टीको मुल नेतृत्वको स्प्रिटमा नै रहेको उल्लेख गर्नुभयो । नयाँ कार्यसमितिलाई आफ्नो तर्फबाट बधाई दिँदै ढकालले सकारात्मक हिसाबले कार्यसमितिलाई सहयोग गर्ने प्रतिवद्धता पनि व्यक्त गर्नुभयो ।
उहाँले पार्टीका केही स्थायी कमिटीका सदस्यहरुले पार्टी अध्यक्ष केपी शर्मा ओलीलाई देखाएर कार्यकर्तालाई थर्काउने फकाउने क्रियाकलाप गरेको भन्दै त्यसबाट निर्वाचनको निष्पक्षतामा प्रश्न उठेको बताउनभुयो ।
शपथ ग्रहण कार्यक्रममा आफूलाई प्रत्यासीको रुपमा बोल्नसमेत नदिएकाले नयाँ कार्यसमितिलाई बधाई दिन र आफ्नो धारणा व्यक्त गर्न पत्रकार सम्मेलन गर्नु परेको उहाँको भनाइ छ ।
